മശകം

ഭാഗം 1: മശകം - ദ ഫാൾ

സുഹൃത്തുക്കൾക്കെല്ലാം ജോലിയാവുന്നത് രാഹുലിനും സന്തോഷം തന്നിരുന്ന കാര്യമാണ്. എന്നാൽ എല്ലാവരും തന്നെ ഉടനെ കല്യാണം കഴിക്കാൻ കൂടി തുടങ്ങിയത് തെല്ലൊരമ്പരപ്പിലേക്കും അനാഥത്വത്തിലേക്കുമാണ് രാഹുലിനെ തള്ളി വിട്ടത്. ജനുവരിയിലെ തണുപ്പ് ശരീരത്തിൽ നിന്ന് മനസ്സിലേക്ക് പടരാൻ തുടങ്ങിയിരിക്കുന്നു. പുതിയതൊന്നും കാണിക്കാനില്ലാതെ ജനലുകൾ അടഞ്ഞുകിടക്കുന്നു. തണുപ്പല്ലാതെ മറ്റൊന്നും തരാനില്ലാതെ ഫാൻ ചത്തുതൂങ്ങിക്കിടക്കുന്നു. ഇരുട്ടിനും നിശബ്ദതയ്ക്കും പോലും തണുപ്പുള്ളത് പോലെ. പലതും ആശിച്ച്, എന്നാൽ സ്വയം ആശ്ലേഷിച്ച് രാഹുൽ കിടന്നു.

ഉറക്കം വരുന്നില്ല; കൊതുക്. ഇന്നിനി ഒരങ്കത്തിനില്ല; ക്ഷമിച്ചിരിക്കുന്നു; വേണ്ടത് കുടിച്ചിട്ട് പോട്ടെ. ഒരു ദിവസം അങ്ങനെ പോയി. പിറ്റേ ദിവസവും അവൾ വന്നു; രാഹുൽ വീണ്ടും ക്ഷമിച്ചു; പുതപ്പിൽ ചോര പറ്റിക്കണ്ട എന്നു വിചാരിച്ചിട്ടാണ്. മൂന്നാം ദിവസവും അവൾ രക്തദാഹിയായി വന്നു. ഇത്തവണ ഏറ്റുമുട്ടാൻ തന്നെയാണ് രാഹുലിന്റെ തീരുമാനം. വെളിച്ചത്തിന്റെ ആനുകൂല്യം വേണ്ടെന്നു വച്ച് രാഹുൽ ശത്രുസംഹാരത്തിന് തയ്യാറെടുത്തു. കനത്ത പോരാട്ടം തന്നെയാണ് പിന്നീടുള്ള അഞ്ച് മിനുട്ട് കാണികളില്ലാതെ അരങ്ങേറിയത്. അന്തിമ വിജയം രാഹുലിന് തന്നെ. അവസാന നിമിഷം, എന്നാൽ മത്സരത്തിലാദ്യമായ് തന്റെ വിശാലമായ കൈപ്പത്തിയുടെ പ്രഹരം കൊതുകിനേറ്റതായി രാഹുലിന് മനസ്സിലായി. ശത്രുവിന്റെ നിശ്ചലമായ ശരീരവും ചോരക്കളമായ കൈപ്പത്തിയും നാളെ വൃത്തിയാക്കാമെന്ന് മനസ്സിൽ പറഞ്ഞ് ഒരു ദീർഘനിശ്വാസത്തോടെ അയാൾ പുതപ്പിനടിലേക്ക് കയറി.

ഭാഗം 2: മശകം - ദ ലൈഫ്

കാറ്റത്ത് പാറിപ്പോയേക്കാവുന്ന ഒരു ജഡത്തിന് വേണ്ടി മെനക്കെടേണ്ട. രാഹുൽ തന്റെ ഏകാന്തതയുടെ മറ്റൊരു ദിവസത്തിലേക്ക് കടന്നു. ആളുകൾ കല്യാണം കഴിക്കുകയും കഴിപ്പിച്ചു കൊടുക്കുകയും ചെയ്യുന്ന ഒരു സാധാരണ ദിവസം തന്നെയായിരുന്നു അത്. എല്ലാവിധ ക്ഷണങ്ങളും ഒരേ വിധത്തിൽ നിരസിച്ച് കൊണ്ടും ചിത്രങ്ങളിൽ അയവിറക്കിക്കൊണ്ടും രാഹുൽ അന്ന് രാത്രിയോടെ ഉറക്കത്തിലേക്ക് വഴുതി വീണു.

നവ്യാ നായരുമായുള്ള വിവാഹം കഴിഞ്ഞ് പോസ്റ്റ് വെഡ്ഡിങ്ങ് ഷൂട്ട് നടക്കുകയാണ്. സ്വപ്ന നായികമായുമായുള്ള നർമ സംഭാഷണങ്ങളും കാൻഡിഡ് പൊട്ടിച്ചിരികളുമാണ് സീൻ. ഒരു പാട് റീടേക്കു കൾ. നീളൻ ഡയലോഗുകൾ. വാക്കുകൾ ഒന്നും വ്യക്തമല്ല. ഓരോ മൂളലുകൾ പോലെ.

പോകെ പോകെ മൂളലുകൾ തീവ്രമായി. അലോസരമായി. യാഥാർത്ഥ്യമായി. ജീവിതമായി.