കടലാസ്

നനഞ്ഞാൽ കീറുന്ന

മഷിപടരുന്ന കടലാസ്.

ഉണങ്ങിയാൽ ചുളുങ്ങുന്ന

നിറം മങ്ങുന്ന കടലാസ്.

എഴുത്ത് തെളിയുന്ന

എഴുതാപ്പുറം കാണാത്ത കടലാസ്.

വരയിടാത്ത, എന്നാൽ

വരപ്പാടുകൾ മായാത്ത കടലാസ്.

കാറ്റത്ത് പാറുന്ന

കനമില്ലാത്ത കടലാസ്.

കനലിൽ കരിയുന്ന

കടുപ്പമില്ലാത്ത കടലാസ്.

ചക്കര പൊതിയുന്ന

ചവറും പൊതിയുന്ന കടലാസ്.

എന്തിനെയും മൂടും, എന്നാൽ

എന്തുകൊണ്ടും മുറിയുന്ന കടലാസ്.