നീളുന്ന കൈകൾ

എല്ലാരും നനയുന്ന മഴയിൽ ഞാനും നനയുന്ന പോലെ

അതെന്നെ മാത്രം നനയ്ക്കുന്ന പോലെ

എനിക്കു മാത്രം തണുക്കുന്ന പോലെ

കാലുകൾ കുതിർന്ന് വിരലുകൾ വിറച്ച്

ഒറ്റയ്ക്ക് ഞാൻ തനിച്ചാകുന്ന പോലെ;

ഒരു മറ പോലുമരികിലില്ലാത്ത പോലെ.

അകലെ അടഞ്ഞൊരു കടയുടെ തിണ്ണയിൽ

കൈകൾ നീട്ടി വിളിക്കുന്ന പോലെ;

അൽപമിടമുണ്ട്, വരികെന്ന് പറയുന്ന പോലെ.

മഴയോട് തോറ്റ്, എന്റെ മടി തോറ്റ്, ഞാൻ

എന്നോട് തന്നെ ചിരിക്കുന്ന പോലെ;

എന്നെ നോക്കിയാരോ ചിരിക്കുന്ന പോലെ.

ഇരുളിലാ തിണ്ണയിൽ തിങ്ങി നിൽക്കുമ്പോഴും

ആരുമാരേയും തൊടാത്ത പോലെ;

എന്നാലെല്ലാമറിയുന്നെന്ന പോലെ.

ഞാനും കൈ നീട്ടി, ഒരാൾ കൂടി വന്നതും

തണുപ്പ് തെല്ലാന്നു കുറഞ്ഞ പോലെ;

ഉള്ളിലിനിയും ചൂടുണ്ടെന്ന പോലെ.