സുമേഷ് ഒരു പാവമായിരുന്നു. അദ്ദേഹത്തിന് ഒരു റൂം മേറ്റുണ്ടായിരുന്നു. അന്യദേശക്കാരൻ. സുമേഷിന്റെ മാതൃഭാഷ റൂം മേറ്റിന് അന്യമായിരുന്നെങ്കിലും, അന്യദേശക്കാരന്റെ മാതൃഭാഷ പ്ലസ്ടുവിന് സെക്കന്റ് ലാംഗ്വേജായി പഠിച്ചിരുന്നതിനാൽ അദ്ദേഹത്തിന്റെ എല്ലാ സംസാരങ്ങളും സുമേഷിന് മനസ്സിലായിരുന്നു.
പറയത്തക്ക ദുശ്ശീലങ്ങളൊന്നുമില്ലാത്ത ഒരു ശുദ്ധനായിരുന്നു റൂം മേറ്റ്. സുമേഷിന്റെ ഭാഗ്യം! പോരാത്തതിന് സുമേഷിനെ പോലൊരു റൂം മേറ്റിനെയാണ് അന്യദേശക്കാരനും ആഗ്രഹിച്ചിരുന്നത്. രണ്ടു പേർക്കും സന്തോഷം.
സുമേഷ് രാത്രി വൈകിയാണ് ഉറങ്ങിയിരുന്നത്. യൂ ട്യൂബ് വീഡിയോകളോ ഇംഗ്ലീഷ് പ്രീമിയർ ലീഗോ സുമേഷിന്റെ ഉറക്കം രാത്രി ഒരു മണി, രണ്ടു മണി വരെയൊക്കെ നീട്ടിക്കൊണ്ടു പോയിരുന്നു. ഈ സമയമത്രയും റൂമിലെ ലൈറ്റ് ഓഫ് ചെയ്യാറുണ്ടായിരുന്നില്ല. റൂം മേറ്റ് ഉറക്കം വരുമ്പോൾ ഓഫ് ചെയ്തു കൊള്ളുമെന്ന് സുമേഷ് കരുതിയിരുന്നു. എന്നാൽ അതുണ്ടായില്ല. എത്ര വെട്ടമുണ്ടെങ്കിലും ഉറങ്ങാൻ കഴിയുന്ന അനന്യസാധാരണനായിരുന്നു ഈ റൂം മേറ്റ്. എങ്കിലും ലൈറ്റ് ഓണാക്കിയിട്ട് തന്റെ റൂം മേറ്റിനെ വേദനിപ്പിക്കണ്ടെന്ന് സുമേഷിന് തോന്നി. (അയാൾ തന്നെ പറ്റി എന്തു വിചാരിക്കും, തന്റെ നാട്ടുകാർ മുഴുവൻ മോശക്കാരാണെന്ന് ചിന്തിക്കില്ലേ..!!) സ്വയം നന്നാവാനും ഇതാണ് നല്ലതെന്ന് ചിന്തിച്ച് പിന്നീടുള്ള ദിവസങ്ങളിൽ സുമേഷ് നേരത്തെ കിടന്നുറങ്ങാൻ തീരുമാനിച്ചു.
പതിനൊന്ന് മണിക്ക് കിടന്നിട്ട് ഉറക്കം വരുന്നില്ല. ഹല്ലാ, തുടങ്ങിയല്ലേ ഉള്ളു, രണ്ടു ദിവസം കൊണ്ട് ശരിയായേക്കും. ശരിയായി. ഇപ്പോൾ നല്ല ഉറക്കം കിട്ടുന്നുണ്ട്. അതിനു ശേഷം സുമേഷിന്റെ റൂം മേറ്റാണ് വൈകിയുറങ്ങുന്നത്. അതേസമയം, നേരത്തേ തന്നെ ലൈറ്റ് ഓഫ് ചെയ്യാൻ സുമേഷും മുൻകൈയ്യെടുത്തു. ഒരു തുള്ളി ലൈറ്റുണ്ടെങ്കിൽ പോലും സുമേഷിന് ഉറങ്ങാൻ കഴിയുമായിരുന്നില്ല. പ്രീമിയർ ലീഗായിരുന്നു സുമേഷിന്റെ വീക്ക്നെസ്സെങ്കിൽ മൊഴിമാറ്റം നടത്തിയ അന്യഭാഷാചിത്രങ്ങളായിരുന്നു റൂം മേറ്റിന് ഹരം. പക്ഷേ, ഒരു പ്രശ്നം. അദ്ദേഹത്തിന് ഇയർഫോൺ വെക്കുന്ന ശീലം തീരയില്ലായിരുന്നു. റൂം മേറ്റ് ഉറങ്ങുന്നതു വരെ ഐറ്റം ഡാൻസ് സോങ്ങുകളും ഹീറോയുടെ മാസ് ഡയലോഗുകളും ഹീറോയിന്റെ കരച്ചിലുകളും ആ മുറിയുടെ ചുവരുകളെ പ്രകമ്പനം കൊള്ളിച്ചു. ആദ്യമൊക്കെ ഇയർഫോൺ ഉപയോഗിക്കാൻ സുമേഷ് അഭ്യർത്ഥിച്ചിരുന്നു. എല്ലാ ദിവസവും ആവർത്തിച്ച് ആവശ്യപ്പെട്ടിരുന്നു. പിന്നെ സുമേഷിന്റെ ഉളുപ്പ് ഇടപെട്ട് അവനെ ആ ഉദ്യമത്തിൽ നിന്ന് പിന്തിരിപ്പിച്ചു. സുമേഷിന് എന്നെന്നേക്കുമായി ഉറക്കം നഷ്ടപ്പെട്ടു.
ഇതിനിടയിൽ ഉറക്കം വരാൻ സുമേഷ് പരീക്ഷിച്ച ഒരു പാട് പദ്ധതികൾ നിർദ്ദയം പരാജയപ്പെട്ടിരുന്നു. യൂട്യൂബിലെ താരാട്ടുപാട്ടുകൾ, നൂറു തൊട്ട് പൂജ്യം വരെയെണ്ണൽ, പകൽ ആവശ്യത്തിൽ കൂടുതൽ ശാരീരികാദ്ധ്വാനം... ഒന്നും വേണ്ടത്ര ഫലം കണ്ടില്ല. മാത്രമല്ല, പഴയ രണ്ടു മണി ഉറക്കത്തിലേക്ക് തിരിച്ചു പോകുമെന്ന അവസ്ഥയുമായി.
ക്ഷമയുടെ നെല്ലിപ്പലക കണ്ടു നിന്നിരുന്ന സുമേഷിന് ഇന്ന് സന്തോഷത്തിന്റെ ദിവസമാണ്. റൂം മേറ്റിന് ട്രാൻസ്ഫർ കിട്ടി, വെക്കേറ്റ് ചെയ്യുവാണ്. സുമേഷ് ആവേശത്തോടെ അന്യദേശക്കാരനെ യാത്രയാക്കി. പോവുമ്പോൾ ആ മനുഷ്യന് സുമേഷിനെ പറ്റി പറയാൻ നല്ലതുമാത്രമേ ഉണ്ടായിരുന്നുള്ളു. ഉറക്കം നഷ്ടപ്പെടുന്നതുവരെയുള്ള കാലയളവിൽ സുമേഷിനും അയാളെപ്പറ്റി നല്ലതേ പറയാനുണ്ടായിരുന്നുള്ളു.
രണ്ടു ദിവസം കഴിഞ്ഞാൽ പുതിയ റൂം മേറ്റ് വരും. ഇത്തവണയും ഒരന്യദേശക്കാരനാണ്.
സുമേഷിന്റെ മനസ്സിൽ ഇപ്പോൾ ഒരൊറ്റ ചിന്തയേ ഉള്ളൂ, "ഏത് @@മ®നായാലും കൊള്ളാം, ഉറക്കം കളഞ്ഞാൽ എന്റെ സ്വഭാവം മാറും!".
സുമേഷ് ശരിക്കും പാവമായിരുന്നു. പക്ഷേ ഉറക്കം കിട്ടാതെ വരുമ്പോൾ ആളുകളുടെ സ്വഭാവം മാറുന്നത് എന്ത് കഷ്ടമാണ്.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ