നിറവ്

മഴയില്ലെങ്കിലും ഒരു നനവ് തോന്നുന്നു;

ഓർമയുടെ കുളിരാവാം,

ഒരിളം കാറ്റിൻ്റെ തലോടലാവാം.

വരികളില്ലാത്തൊരീണം കേൾക്കുന്നു;

ഹൃദയം തുടിച്ചതാവാം,

ഒരാളെന്നെയോർത്തതാവാം.

മിഴിപ്പൂട്ടിനുള്ളിൽ മുഖങ്ങൾ തെളിയുന്നു;

കാണാൻ കൊതിച്ചതാവാം,

മനസ്സെന്തോ തിരഞ്ഞതാവാം.

ഉണരാനായുറങ്ങുവാൻ തോന്നുന്നു;

എൻ്റെ നെടുവീർപ്പാവാം,

നാളേക്കൊരു കരുതലാവാം.

ഈ രാവിൽ ഒരു നിറവ് തോന്നുന്നു;

വികലമായൊരു നിനവാവാം,

വീടൊഴിഞ്ഞൊരു വിഷാദമാവാം.